Halgamaa Sheekh Cabdiramaan Yuusuf Magan oo aan ku booqday Guriga uu ka dagan yahay Magaalada Jigjiga ayaa waxaa na dhexmaray Is-xog-waraysi kooban waxaana jeclaystay inaan Bulshada la wadaago inyar oo kamida Taariikh Halgameedkiisa waxayna u dhigan tahay sidatan:-

Ugu horayn Halgamaa Sheekh Cabdiraxmaan Yuusuf wuxuu ku dhashay Daaloote oo Degmada Galaalshe katirsan Sanadku markuu ahaa 1930-kii isla goobtaas buuna Qur’aanka ku bartay si qododheerna ugu Akhristay Kutubta Cilmiga diinta Islaamka, Isagoo yar baana Sheekh Cabdiraxmaan loogu yeedhay, Gadaashiina wuxuu usoo wareegay dhinaca Soomaaliya wuxuuna galay Jaamacadii Lafoole oo uu kasoo Qalin-jabiyay Takhasusaad khaladuwana kasoo qaatay.

Intaas kadib Sheekhu wuxuu Halganka bilaabay 1963-dii wuxuuna kubiiray Geeshkii Makhtal Daahir wuxuuna qaatay Tababar Ciidan oo heerkiisu sareeyo wuxuuna galay Dagaalo badan oo Gumaysiga lagu Naafeeyay, kadibna wuxuu noqday Hogaankii Dhaqaalaha ee Jabhadii Geeshka la baxday Dhowr sano kadib markii Jabhadaasi hagaastay wuxuu Sheekh Cabdiraxmaan wax ka Aas’aasay Jabhadii Xoraynta Soomaali galbeed wuxuuna kamid noqday Golihii dhexee ugu horeeyay ee ay Jabhadaasi yeelato Kadibna markay Dalka ka xoreeyeen Gumaysigii Xabashida, waatii ay dhowr wadan oo ay kamid ahaayeen Kuuba, Yemen & Ruushku ay si dadban iyo si toos ahba Dagaalka usoo galeen iyadoo Mabaadi’da Ururkuna ay ahayd mid Lig-liganaysa oo hadba meesha ay Dowladii dhexe ee Soomaaliya ujeediso u leexanaysa, Waakii xoogagaas isbahaystay waatii ay dagaalkii ku jabiyeen Jabhadii WSLF halkaas buuna Halgankaasina ku joogsaday.

Waxay Halgamadu Qori isu dhiib soo ahaadaanba Dhowr sano kadib dhuxushii Halgankii WSLF oo danbaaburo yari kasii nooshahay ayaa waxaa Halganka Maanta socda ee ay ONLF hormuudka ka tahay Aas’aasay Lix Nin oo uu kamid ahaa Sh. Cabdiraxmaan Yuusuf Magan kuwaasoo kala ahaa:-

1- Sheekh Ibraahin Cabdala Maax
2- Sheekh Cabdiraxmaan Yuusuf Magan
3- Dr. Cabdiraxmaan Maxamed Mahdi
4- Dr. Maxamed Ismaaciil Cumar
5- Cabdulaahi Maxamed Sacdi
6- Cabdi Ibraahin Geele

Wuxuuna Sheekhu noqonayaa Makhraatiga ee Nool ee Sadex Halgan oo Ogadeniya soo martay halka uu laba kamida dadkii Aas’aasay kamid ahaa, Intaas kadib markii Jabhada ONLF gudaha soo gashay 1991-dii ayuu Ururka uga weecday si khilaaf la’aan ah wuxuuna wax ka Aas’aasay Gudoomiye na ka noqday Xibsigii Tadaamun, Sidoo kale wuxuu kasoo mid noqday Xisbi kale oo WSD uu iigu sheegay Sheekhu kuwaasoo aan dhamaantood si rasmi ah u tabarinin ama u hanoqaadin, Ugu danbayntii Sheekh C/raxmaan Yuusuf wuxuu u baydhay dhinaca Jameecada Tabliiqa oo uu ilaa iyo hada kamid yahay Golaha Shuurada ee ugu sareeya Khuruujka.

Sheekh Cabdiraxmaan wuxuu Ururka ONLF usoo jeedayay Dardaaran kooban oo macno wayn xambaarsan wuxuu yidhi:- ONLF waa Ururka kaliya ee Danaha Ummada Soomaaliyeed u taagan sidaas darteed waxaad muujisaan Deganaansho, Adkaysi, Samir, Dulqaad & Kaladanbayn, Danaha gaarka ahna ka fogaada oo Danta guud kawada shaqeeya, Cidii idinka du’da udhimriya oo si kalsooni iyo is-jacayl ku dheehan tahay u wada hawlgala, kuna tashada xoogiina, xikmadiina, xoolihiina iyo Ilaahay ood ku xidhnaataan Cibaadadiisana aad ku dadaashaan Taladiina oo dhana aad udhiibataan.

Fiiro gaar ah:- Sheekh Cabdiraxmaan waa Nin aad u da’wayn oo 100 sano da’diisu ku dhawdahay wuxuuna kamid ahaa koox Jabhada kamida oo Garanuug loo yiqiinay oo isku dhaarsatay Ogadeniya oo Xorowda mooyaane inaysan Guursanaynin sidii buuna Guur la’aan u yahay.

WQ: Shaafici Maxamed.

 

Comments are closed

Sorry, but you cannot leave a comment for this post.

 
 

ILAYS TV Shirwynihii JWXO maalinkii 1 aad Qaybtii u dambaysay