Donald Trump, Madaxweynaha Maraykanka ayaa markale weeraray xeer illaaliyaha guud ee dalkaasi Jeff Sessions xili ay Trump ku furanyihiin baadhitaanno la xidhiidha in uu Ruushka garab ka heley xiligii doorashadii dhacday sanadkii hore 2016.

Warar ay baahiyeen Saxaafada Maraykanka ayaa sheegaya in Trump uu ka fikirayo in uu xilka ka qaado Sessions oo maalmahanba hadal-heyntiisa ay socotay. Trump ayaa boggiisa Twitterka waxa uu ku qoray “Xeer Illaaliyaha Guud Jeff Sessions waxa go’aan daciifnimo ah ka qaatay baaritaanka la xidhiidha dambiyada ay gashay Hillary Clinton , iyo dadka faafinaya siraha dalka”.

Mar sii horeysey Trump waxa uu Sessions ku tilmaamay nin go’doonsan, isaga oo ka shalaayay in uu markii horeba xilka u magacaabay. Waxa uu Trump ninkani ku heystaa sababta uu isaga saaray guddiga baaritaanka FBI ee la xidhiidhay lugtii Ruushka ku lahaa doorashadii dhacday sanadkii hore.

Isfaham darada Trump iyo xeer illaaliyaha ayaa gaadhay halkii ugu sareysey iyada oo Jeff Sessions uu Aqalka Cad tagay Isniintii si uu ula kulmo Trump, balse kulankaasi ma uusan dhicin sida ay sheegtey Sarah Huckabee Sanders oo ah afayeenada Aqalka Cad. Wararka qaarkood oo soo baxay ayaa tibaaxaya in Trump uu booska ninkani ku badali doono duqii hore ee magaalada New York Rudy Giuliani.

Balse sida uu sharciga qabo haddii Sessions xilka laga qaado waxaa isla markiiba booska buuxinaya ku xigeenkiisa Rod Rosenstein, hase yeeshee Trump ma jecla ninkani laftiisa, horey ayuuna eedeymo ugu jeediyey. Dadka siyaasadda u dhuun-daloola waxa ay sheegayaan in bartilmaameedka ugu weyn ee Trump uu yahay Ergeyga gaarka ah ee baaritaanka fadeexadda Ruushka, Robert Mueller, kaasi oo uu ul booc ah ugu tukubayo sidii uu meesha oga saari lahaa.

Ma jirto cid ka badbaaday Trump, todobaadkii hore waxa uu u duur-xuley Agaasimaha cusub ee FBI-da Andrew McCabe, kaasi oo uu ku sheegey wax u muuqdey eedeyn musuq-maasuq, isaga oo sheegey in Hillary Clinton ay xaaska McCabe siisay lacag gaaraysa $700,000 . Sidoo kale todobaadkii hore waxaa xilkii isaga dagay afhayeenkii Aqalka Cad Sean Spicer oo ahaa foolka muuqda ee Trump.

 

Comments are closed

Sorry, but you cannot leave a comment for this post.

 
 

ILAYS TV Shirwynihii JWXO maalinkii 1 aad Qaybtii u dambaysay