Dabadhilifyadii oo luqunta lagalay xarigii lagu daldali lahaa
Aj-gudhay oo diin huwanayd iyo jihad ayaan gaalada Itobiya kula jirnaa, ayayna dadweyneha qaarkood ogsoonayn hadda ka hor inay ahaayeen intooda badan qaar ugu qafaalnaa siyaaba kala duwan gumaysiga Itobiya oo fulinayay siyaasad ay Itobiya wadato.
Waxaa jiray qaar ay Itobiya qabteen markii la jabiyay ururkii Itixaadka oo muddo ka dib uu soo daayay cadawga iyagoo la soo jaheeyay. Waxaa jiray qaar lacaga farabadan oo ururkii Itixaadka uu lahaa qaatay ka dibna u galay Itobiya si aan looga daba imaanin. Waxaa jiray qaar la qabtay markii ay ciidamada Itobiya galeen Somaliya oo la meeleeyay. Waxaa jira qaar ay sirdoonka caalamka gacanta ku dhigeen ka dibna Itobiya loo wareejiyay. Afraadaa oo idil waxay si qarsoodi ah ugu shaqaynayeen gumaysiga iyagoo diin iyo magac jihaad adeegsanaya.
Dadweyne fara badan oo jecel halganka shacabkeena ayaa aad u soo dhaweeyay is-dhiibidda kooxdan oo ku tilmaamay inay tahay guul u soo hoyatay JWXO, sababtoo ah bay yidhaahdeen; wajigoodii dhabta ahaa ayay muujiyeen hadda. Nifaaqii iyo beentii ay dadka kula dhex jireen ayaa soo afjarantay, hadda wixii ka dambeeyana ma jirto wax aan ahayn Itobiya waan la heshiinay oy ku gabaadaan.
Waxaa iyaguna hadda sii socda sida ay warar xogogaal ah sheegayaan kooxdii ka falaagowday ururka ee loo xilsaaray waagaa inay kala jabiyaan ururka iyagoo adeegsanaya laaluush ay Afrika la dhex tageen iyo qabyaalad uu shacabkeenu ka gudbay oy kula dhex jireen jaaliyadaha dibadda. Waxaa la soo sheegayaa inay aad isugu dhabar jabiyeen inay dad ay ku shir tagaan ka sii kaxeeyaan jaaliyadaha dhexdooda iyo Geeska Afrika, hasa ahaatee warar sugan ayaa sheegaya inay arintaasi guuldaro ka raacday ka dib markii ay diideen dadkay isku halaynayeen in magacooda iyo muuqaalkooda ay isticmaalaan.
Gumaysiga oon ka korin dacaayada raqiiska ah ee ah garab JWXO ah ayaa jirta oo u soo gashay gumaysiga taasoo u socon weyday xataa 90aadkii qarnigii tagay ayuu mar labaad doonayaa inuu tijaabiyo. Waxaana la soo sheegayaa in kooxdii uu sidaa ku hawlgaliyay oo kala dhaqaaqay uu doonayo hadda inuu soo jafjafo oo geed hoostii la’isugu keeno si loo sawiro.
Arimahaasoo idil waxay muujinayaan sida ay qoreen dadka sida fiican ula socda xaaladda Itobiya inuu ku guuldareystay nidaamka KT Zinawi inuu la soo afmeero (Containment) halganka ONLF hormuudka ka tahay ee ka socda Ogadenya.
