Dabayshii xoriyadda ayaa ka babanaysa oo durbadiiba neecawdeeda laga wada dareemay gabi ahaanba Ogadenya. Shacabka Ogadenya ayaan wadada xoriyadda ka weecanayn ilaa dhamaadkeeda. Shacabkan halgamaaga ah ayaan waligood isdhiibin, waligeedna aanu hoos u dhicin mooraalkooda balse kaga hortagey gumaysiga Itobiya geesinimo iyo mintidnimo aan waligeed horey loo arag.
Waxaa kaloo uu yidhi qoraagu; shacabka Ogadenya wuxuu u huray naf iyo maal badan siduu u soo dhacsan lahaa xoriyadii laga boobay, iyadoo ay kaga shihiideen kumanaan wiilashooda iyo gabdhahooda ah oo da’ walba leh. Wuxuu cadawga ma-naxaanka ah ka burburiyay intaaso magaalo iyo intaasoo tuulo, beerahoodii ayuu cara-rogay, wuxuu kala wareegay hanti badan, wuxuu si dadka shacabka iyo xoolahaba u dhamaadaan uu sumeeyey ceelashoodii, wuxuuna gubay daaqsinkoodii. Wuxuu iska hortaagay asaaskii nolosha ugu yareyd sida cuntadii iyo daawadii. Waxaa ugu xareysan xabsiyada maleesiyda Tigreeega ee u ooman dhiiga dadka kumanaan qof oo aan wax dambi ah galin, waxayna ku xadgudbaan sharftii gabdhaha Ogadenya oy qaar badana dileen qaar kalena daldaleen iyagoo maydkooda soo dhiga wadooyinka.
Taasoo jirta buu yidhi qoraagan; ayay shacabka Ogadenya u adkaysteen dhibka halganka, waxayna ka gudbeen caqabada badan, hoosna uma dhigin dilkaa iyo baabi’intaa iyo layntaa wadarta ah iyo gaboodfalkaa xuquuqda aadanaha rabitaankoodi iyo casiimadoodii. Waana taa ay maanta qarka u saaran tahay inay hantaan xoriyadoodii iyagoo isku-tashaday oy hogaaminayso Jabhadda Wadaniga Xoreynta Ogadenya iyo jamaahiirta Ogadenya ayay abuureen guutooyinkii xoriyadda iyo guusha waxayna u sii jeedaan hadafkooda ah inay ka xoreeyaan dalkooda gumaysiga Abisiinya kaasoo goor dhow ceeb kala tagi doona gabi ahaanba ciida Ogadenya.
Wuxuu ku soo gunaanaday qoraagan carbeed;
Soo bixitaanka qoraxda xoriyadda (fajral istiqlaal) waxaa inaga xiga un waqti yar, si kastoy uga caga jiidaan kuwa diidan iyo kuwa u adeega ee saynta gumaysiga ah ee sharaftoodii kaga iibiyay gumaysiga si raqiis ah, umana suurtagali doonto waxay rabaan maleesiyaadka Wayaanaha ee guutooyinka muqaawamada ee geesiyiinta ah ayaa darsin aanay waligood iloobin u dhigi doona, waxayna dib ugu noqon doonaa goobtii uu awowgoodii hore ee Abraha ka soo duulay markii lagu soo daadiyay dhagaxyadii Sijiilka.
