Kullan lagu cambaareyey dad Puntland lagu xirxirey oo lagu qabtay Johannesburg
Kullan degdeg ah oo ay isugu yimaadeen dad faraobadan oo kasoo jeeda beesha Absame ayaa ka dhacay magaalada Johannesburg kullankaasi oo si weyn loogu cambaareeyey rag beeshani kasoo jeeda oo dooni laga degey Puntland kadibna xabashid aloo gacan galiyey.
Suldaan Dugsiye oo ahaa oday dhaqameedkii ugu horeeyey ee kullanka ka hadlo ayaa wax laga xumaado ku tilmaamay falka Puntland ay dooni dhan kala degtey 5 qof oo beel kaliya kasoo jeeda halka dadkii kalana aanan waxbo loo dhimin “waa arrin ceeb iyo yaxyax ah in madaxweynaha Puntland uu kala diro ciidamadii dekeda Boosaaso kadibna illaaladiisa gaarka ah ay doon dhan oo buuxda ay kala degto shan nin oo beesha Absame ka dhashay kadibna ka iibsado cadawga” ayuu yiri, isagoo ku baaqay in Puntland ay si shuruud la’aan kusoo faxaan ragaasi.
Sidoo kale waxaa kullanka ka hadlay Cabdullaahi Qoriyoow Jaamac oo sheegey in xitaa dhaqanka Islaaminada iyo kan Soomaaliga ahba aysan meelna kaga jirin in dad laga iibsado cadawga dalka,
Bashiir Bacoole oo isaguna hadlay ayaa yiri “Puntlan waa dhul Soomaaliyeed, ma ahan dhul cadaw, waana dhul Soomaalinimo loogu halgamay, halkii xoriyadii ay ku wada kifaaxi lahaayeen dadkii Soomaaliyeed oo dhan waa nasiib darro in maanta isla cadawgii looga iibsado dad Soomaali ah” .
Cumar Nakiir oo isana hadlay ayaa ku baaqay in beesha Absame ay meel uga soo wada jeedsato dhibaatooyinka sida joogtada loogu hayo dadka beesha u dhashay ee loo bartilmaameedsanayo heebtooda darteed.
Dadkii hadlay oo dhamaantood ku hadlayay hadalo caadifad xoogan ay ka muuqato oo aanan soo xigan karin anigoo illaalinaya anshaxa saxaafada, ayaa baaq cambaareyn ah dusha uga tuurey maamulada Puntland iyo Somaliland oo ay sheegeen in ay caadeysteen dhibaateynta dadka kasoo jeeda beesha Absame.
Qabanqaabiyeyaasha kullanka oo kala ah Maxamed Tube Sahal iyo Shariif Maxamuud ayaa KismaayoNews u sheegey in shirka uu ahaa mid si degdeg ah loo abaabuley isla markaasina looga gol lahaa in cod mideysan lagu muujiyo dhibaatada dadka beesha ku heeysata gobolada waqooyi bari iyo waqooyi galbeed, waxay sheegeen in ujeedkii laga lahaa kullanka laga gaaray, aanan loo fasiran karin in lagu abaabulayo dhibatao dad gaar ah lala damacsanyahay balse uu kaliya ahaa mid looga dhiidhinayo dhibaato dadkooda heysata, waxay meesha ka saareen in dhibaatada ay mas’uul ka yihiin beelaha wada degan Puntland iyo Somaliland, “beelo gaar ah ayaa mas’uul ka ah arrintani, jawaabteedana weey heli doonaan haddii alle idmo”.
Shanta nine e doonida lagala degey ayaa mid ka mid ah la dhiibey kaasina waxaa lagu magacaabaa Cabdi Xussen Yuusuf, doonida waxay timid dalka Yemen, markii ay dekeda Boosaaso kusoo xiratayna waxaa si gaar ah dadkani ula degey illaalada Madaxweynaha Puntland Cabdiraxmaan Faroole, sida ay odayaasha ku doodayaan. |
